Jensits

Liebä Gian

Da mier üs ned so viel underhaltä, hani denkt, i schribe mal via «Frutigländer».

Churz zu üserä Kolumnischtä-Tätigkiit: I glube, es isch ä Schuss ids iigetä Bii gsy, das Ganzä uf Bärndütsch z schribä. Es git wäder Rächtschribe-Korrekturä no ä Abchürzig via künschtliger Intelligenz. Janu. Itz müessemer halt mal kreativ wärde.

Voletscht hani mi miter String-Theorie befasst. Wieso? Wil i es mengisch meh u mengisch weniger starch usprägts Ufmerksamkiitsdefizitsyndrom ha u ig mi ufzmal mit Sachä wie em Römischä Riich, dä Rattäliniä vom 2. Wältchrieg, dr Biografie vor Gina Wild oder halt äbe mit dr theoretischä Physik befassä.

Sachä, wo d’Wält bewegä.

Das miter String-Theorie isch sone Sach. I ha sofort mal gmerkt, dass weni mi ir Thematik vor theoretischä Physik bewegä, ig mier vorchumä winä Zuchtmuni ar Usmerzi: überforderet.

Hesch du gwüsst, dass nach dr String-Theorie üses Universum us winzigstä Tiilä bestiit, wo aber wienä Art «Gitarräsaite» ufere 3-dimensionalä Sphäre aagordnet sy. Drum String – ha!

Nach därä Theorie – woni immer no ned würklig begriffä ha – sölls somit o uuuuhuerä viel Universä gä, wemä däne Eierchöpf gluubt, de sogar 10 500. Das isch es 1 mit FÜFHUNDERT NULLENE. Let that sink in*.
U diä Universä chönntä sogar diräkt näbe üsem existierä, fern vo üser Wahrnähmig – ganz unbeobachtet wie Teenager, wesi dr Privatmodus im Internet entdeckä.

Vo däm Standpunkt uus sy mier d Inserat vo früejer i Sinn cho:

ICH KANN MIT VERSTORBENEN KOMMU-NIZIEREN (für 3.50.–/Minute) IST ER DER RICHTIGE? MEDIUM KASSAN-DRA HILFT (4.20 / Minute) SUCHST DU TROST AUF OFFENE FRA-GEN? RUF MEREDITHA AN (4.50 / Minute)

Lüt hii dert aaglütä, wil si nümm hii wytergwüsst. Wil si ä Mensch vermissä, Liebeschummer hii oder Angst, allini z stärbä. Tragisch igentlech. Bide erotischä Inserat hii si aaglütä, wil si ifach sy spitz gsy wie Nachbars Lumpi.
(Mir hii i üsem jugendlichä Liechtsinn o mal aaglütä – wo d Telefonrächnig isch cho, hets ä Standing Ovation am Familiätisch gä – isch geil gsy.)

I ha immer gmeint, diä Inserat sygä vo Scharlatane, Bschisshünd u Opportunistä.

I ha denkt, diä Lüt nütze anderi i ihrer Not schamlos us.

Aber vilech lügä üs die Lüt gar ned aa!

Vilech hii di Menschä würkli ä diräktä Draht ines Paralleluniversum, wo jeglichi Naturgsetz, wo mier hiä kennä, gar ned existierä! Si hii d Fähigkiit, zwüsche Dimensionä z vermittlä, si chönnä verloreni Seelenä ufspürä, Chrebs heilä u si chönne sogar mit dim verstorbänä Kater «Chefkoch» redä, Gian!

Mier Normalos chönne diä Prozässä gar ned begriffä – so wie d String-Theorie!

Wär bi ig, dasi über öppis urtiile, nume wilsmer ideologisch necher ligt? Vilech sy di ganze theoretischä Physiker d Scharlatane, d Bschisshünd u d Opportunistä. Si hocke i irne feine Aazüüg ide Elite-Unis u erfindä luter Theoriä, wo mier liechtglübigä Lüt ufnää wiene gueti Sunnäcremä.

I gluube, i lüte am Medium Sahra ah. Si bietet Antwortä uf alli Frage. Si het sogar Kontäkt ids Jensits – u das vo Luzärn uus!

«Hey Sahra, i ha kört, du chasch mit Verstorbenä Kontakt ufnä: Chönntsch du mir mal Stephen Hawking id Leitig tue, i wottmä öppis säge…»

lg, hdg Tino

GIAN & TINO – MULAFFÄ-PODCAST

*lah das Brünneli inä

«GCHERGGET» – Jensits

Image Title

Möchten Sie weiterlesen?

Ja. Ich bin Abonnent.

Ja. Ich benötige ein Abo.

Article

Image Title